அக்கினிப் பூக்கள் !

சி. ஜெயபாரதன், கனடா

 

1. படைப்பாளி இல்லாது
   பிரபஞ்சம் கிடையா து !
   முட்டை முதலாய் இட்டதா ?
   முன்பே கோழி பிறந்ததா
   ஞானத் தங்கமே ?
2. பானை சோற்றுக்கு
   பதம்ஒரு சோறு !
   நுனிப் புல் மேய்ந்து
   வனத்தை அறிவதோ
   ஞானத் தங்கமே ?
3. வந்த சண்டைக்கு நழுவு !
   வராத சண்டைக்குத் தழுவு !
   சண்டை வந்தாலும் முடிவில்
   சமாதானக்  கைகொடு
   ஞானத் தங்கமே !
4. குருடனுக் குதவச் செவிடன் !
   செவிடனுக் குதவ நொண்டி !
   நொண்டிக் குதவக் குருடன் !
   மண்டுக் குதவ யாருளர்
   ஞானத் தங்கமே ?
5. போர் வாளை எல்லாம் நெளித்து
   ஏர் முனையாய் ஆக்கு !
   போர் வாள் நாட்டை ஆண்டால்
   வேர்கள் எங்கே நிலைக்கும்
   ஞானத் தங்கமே ?
6. தூரத்துப் பச்சை
   பார்ப்ப தற்கு இச்சை !
   கிட்டப் பார்வை குள்ளனுக்கு
   எட்ட ஏணி ஏது
   ஞானத் தங்கமே ?
7. காணாத மோதிரம் தேடக்
   கை விளக்கில் திரியில்லை !
   திரி இட்டதும் எண்ணை சிந்த
   தீபம் ஏற்றி வழுக்கி விழுந்தான்
   ஞானத் தங்கமே ?
8. உன்னைப் பற்றி நான் அறியேன் !
   என்னைப் பற்றி நீ அறியாய் !
   இல்லச் சிறையுள் மாட்டி
   பல்லாங்குழி விளையா டுவோம்
   ஞானத் தங்கமே !
9. ஜன்னலில் முகம் பார்க்கும்
   கண்ணாடி வைத்திடு !
   கண்ணாடி இடத்தில் வெளிச்ச
   ஜன்னலை வைத்திடு
   ஞானத் தங்கமே !
10. பாதிப்பேர் மூடர் என்றேன் !
    பளாரென அறைந்தார் அவ்வூரில் !
    பாதிப்பேர் அறிஞர் என்றேன் !
    பூமாலை போட்டார் இவ்வூரில்
    ஞானத் தங்கமே !
11. ஈராக்கில் ஆஹாவென
    எழுந்தது சுதந்திரச் சூரியன் !
    குடிமக்கள் தூங்கினர்  ஆரவாரக்
    கூடார எல்லை வெளியில்
    ஞானப் பெண்ணே !
12. புதுச் செருப்பு வாங்கி
    புகுத்தினான் பழைய காலை !
    செருப்பு பல்லால் கடித்ததும்
    நறுக்கினான் அழுக்குக் காலை
    ஞானப் பெண்ணே !
13. வந்த சண்டை போடவா ?
    வராத சண்டை நாடவா ?
    போன சண்டை கீறி விட்ட
    புண்ணை ஆற்றிக் கொள்ளவா
    ஞானப் பெண்ணே ?
14. ஆழம் தெரியாமல் காலை விடாதே !
    ஒரு கால் நொண்டி
    காலை விடுவானா ? அல்லது
    கோலை விடுவானா
    ஞானப் பெண்ணே ?
15. இராணுவப் படை வலக் கால் வைக்க
    இடக் கால் வைத்தான் பேரன் !
    பாதம் தவறியது படைக்கு,
    பார் என் பேரனை என்றாள் பாட்டி ,
    ஞானப் பெண்ணே !
16. சுட்ட சட்டி எறிவதா ?
    சுடாத சட்டி அறிவதா ?
    சுட்ட சட்டி தெரிந்திட
    எட்டி நிற்க முடியுமா ?
    ஞானப் பெண்ணே ?

*************

S. Jayabarathan [August 7, 2018]  [R-2]