ஆசிரியரைப் பற்றி

உலகெலாம் உணர்ந்து ஓதுதற்கு ஆக்குவது,
கலங்கரைத் தீபமாய்க் கடல்வழி காட்டுவது..

ஆதி முதல்வனை, அண்டக் குயவனை

ஓதி உளத்தில் உணர்.

===============

காலவெளி ஒரு நூலகம் 

சி. ஜெயபாரதன், கனடா 

*************************

வானகம் எனக்கும் போதி மரம் 

வைர முத்துவின் ஞான ரதம் 

வையகம் மக்கள் ஆதி வரம் 

வள்ளுவம் நமக்கு வாழ்வு அறம். 

********************

காலவெளி எனக்கும் ஓர் நூலகம் 

கடவுள் படைப்பி லக்கண நாடகம் 

ஐன்ஸ்டீன் காணும் இறைப் பீடகம் 

அகர முதல் தொடரும் இயல் ஏடகம். 

*********************************

காலம் எனக்குத் திசைகாட்டி  

காவியம் நமக்கு வழிகாட்டி  

ஞாலம் நமக்கோர் ஆலயம்  

ஞானம் எனக்கோர் ஆயுதம்.

*********************** 

கல்வி நமக்கு முதற்படி

காசினி அனுபவம் மேல்படி  

கற்பது முதுமைக் கைத்தடி  

நிற்பது வள்ளுவர் சொற்படி. 

********************************

பாரத நாடெனும் போதினிலே, பரி

பூரணம் தோன்றுது பாரினிலே.

வேரும், விழுதும் ஆழமப்பா, குறள்

வேதம் பிறந்த தேசமப்பா.

*****************************

அணுசக்தி ஆக்கப் பணியில் பொறியியல் துறைகளில் 45 ஆண்டுகளுக்கு மேலாக இந்தியா, கனடாவில் அனுபவம் பெற்று, இப்போது ஓய்வில் தமிழ் இலக்கிய படைப்புப் பணியில் முழு நேரமும் ஈடுபட்டிருக்கிறார். 1960ஆம் ஆண்டு முதல் இவரது விஞ்ஞானக் கட்டுரைகள், கதைகள், கட்டுரைகள் பல கலைமகள், மஞ்சரி, தினமணிக் கதிர், இதயம் பேசுகிறது, மயன், தாய், காலம் இதழ்களில் வெளிவந்துள்ளன. இவரது ஆக்க வினைகளுக்கு அணுசக்தி நூல் 1964இல் சென்னை பல்கலைக்கழகத்தின் மாநில முதற்பரிசு பெற்றது. கணினித் தமிழ்வலைப் பதிவுகள் பின்னிப் பிணைக்கும் புதிய உலகிலே, கடந்த 15 ஆண்டுகளாக 800க்கும் மேற்பட்ட விஞ்ஞானக் கட்டுரைகள், கவிதைகள், கதைகள், நாடகங்கள் பற்பல அம்பலம், திண்ணை, பதிவுகள், அந்திமழை, நதியலை, வல்லமை போன்ற வலைத் தளங்களில் பல்லாண்டுகள் வந்துள்ளன. இவரது நீண்ட தமிழ் நாடகங்கள், மும்பையிலும், சென்னை கல்பாக்கத்திலும் அரங்கேறியுள்ளன.

இதுவரை 27 நூல்கள் வெளிவந்துள்ளன: ஆக்க வினைகளுக்கு அணுசக்தி, வானியல் விஞ்ஞானிகள், அணுசக்தி, தாகூரின் தமிழ்க் கீதாஞ்சலி, அணுவின் ஆற்றல், இந்திய விஞ்ஞான மேதைகள், சீதாயண நாடகம், சீதாயணம் படக்கதை, கீதாஞ்சலி, ஆபிரஹாம் லிங்கன், சாக்ரடிஸ், நெப்போலியன், ஜோன் ஆஃப் ஆர்க், முக்கோணக் கிளிகள் படக்கதை, கலீல் கிப்ரான் கவிதைகள், விண்வெளி வெற்றிகள், அணுமின்சக்தி பிரச்சனைகள், மெய்ப்பாடுகள், அணுசக்தியே இனி ஆதார சக்தி, நைல் நதி நாகரீகம், உலகிலே உன்னத பொறியியற் சாதனைகள், எழிலரசி கிளியோபாத்ரா, காதல் நாற்பது, உன்னத மனிதன், பிரபஞ்சத்தின் மகத்தான நூறு புதிர்கள் (தொகுப்பு 1 & 2), அண்டவெளிப் பயணங்கள். Echo of Nature [English Translation of Environmental Poems (வைகைச்செல்வி வெளியீடு].

சத்தியம்,  சுதந்திரம்,  சமத்துவம், மும்மந்திரம்: காந்தியம் >

மீள்பிறப்பு உண்டாயின் மீண்டும் தமிழகத்தில்

ஏழ்பிறப்பும் நான்பிறப் பேன்.

தமிழியம், இந்தியவியம், உலகவியம்.

+++++++++++++++++++++++++++++++

கற்றதனால் பெற்ற பயன் ஏது  படைப்பாளி
அற்புதத்தைக் காணாத போது ?

மொழிக்கெல்லாம் முன்னெழுத்து ஒன்றே அகரம்
எழுத்தில்லை முன்னால் அதற்கு

பிறவிப் பயன் ஏது, மானிடர் தம் தோற்றம்
அறிய விழையாத போது ? 

உலகைச் செதுக்கி, உலகை  இயக்கி,
உலகைப் புதுப்பிக்கும் ஊழ்.

இமை மூடி மீண்டும் தமிழ்மண்ணில் தோன்றின்
தமிழ்ப்படைக்கும் ஆற்றலைத் தா.

ஏட்டினில் எண்ணெழுத்து கற்கும்முன் பாரதி
பாட்டினில் கற்றேன் பைந் தமிழ்.

தானாகக் கானம் எழுப்பாது வீணை
தனியாகத் தாளம் போடாது  விரல்கள்

குறட்கல்வி, நற்றொழில், நற்சேவை, நாடு,

பிறர்க்கென வாழ்ந்து பிழை.

Short is our tiny Life span

So live your Life while you can

வாழ்வு சிறியது, ஆயுள் குறுகியது

• ஏழ்சொற்கள் போதிக்கும் இல்வாழ்வு மார்க்கமே
• வாழ்முறை ஓதும் குறள்.

வாழும் தருணம் நீ வாழ்ந்து விடு

கல்லடி பட்ட காயம் ஆறிடும், ஆறாதே

சொல்லடி சுட்ட வடு

திராவிட நாடெனும் போதினிலே, கருந்

தேள் ஒன்று கொட்டுது காதினிலே.

பாரத நாட்டில் அது இல்லையப்பா, தேசப்

பாட்டில் பாடினும் ஏது எல்லையப்பா. ?

தானாக இயங்காது மனித உடம்பு

தனியாக வசிக்காது மனித ஆத்மா.

+++++++++++++++

பிறப்புக்கு இருப்பது ஒருவழி, மாந்தர்

இறப்புக்கு இருக்கும் பல.

+++++++++++++

வாக்குரைப் பெரியார் வாசல்முன் நிற்போர்
வையக முதல்வனை என்றுமே தெரியார்.
வாசலைத் தாண்டி வான்வெளி வருவோர்
ஈசனைக் காண்பார், பிரபஞ்சம் அறிவார்.

++++++++++++++++++++++++++

பேரிடர் நேரினும், பேரிழப்பு மேவினும்
காரியம் யாவையும் தோற்பினும் – பாரில்
தனக்கென வாழா பிறர்க்கென வாழ்தல்
மனக்கவலை மாற்றும் மருந்து.

நமக்குத் தொழில்கவிதை, நாட்டிற் குழைத்தல்
இமைப்பொழுதும் சோரா திருத்தல் – தமக்கென
வாழா பிறர்க்கென வாழ்தல் மனிதரின்
ஊழ்விதி என்றே உழை.

[பாரதி மன்னிப்பாராக]

+++++++++++++

பிரபஞ்சம் புரிய பெரியார் வாக்குரை போதா
பிரபஞ்சன் அறிய இறைமறுப்பு ஓதாய் ! 
பிரபஞ்சப் புதிர் அறியார் பெருதிழப்பர்
பிரபஞ்சன் பணியார் தலைவாசல் இடிப்பர்.  

++++++++++++

உருண்ட பூமி நமதே
இருண்ட வானம் நமதே
வரண்ட நீர்வளம் நமதே
முப்பெரும் சூழ்வளத்தை
துப்புரவாய் வைக்கும்,
ஒப்பற்ற பொறுப்பும் நமதே.

++++++++++++++++++++

வாழ்க்கைப் போக்கு வாணிபம் ஆயின்
வரவும் செலவும் வட்டிக் கடன் மூழ்க்கும்.
வாழ்க்கைப் பயணம் பிறர்க்கென மேவின்
வறுமை இல்லா வையகம் தழைக்கும்.

++++++++++++++++++++ 

குழப்ப உலகில் சிறிது சீர்மை அமைத்திடு.
உழைப்பும், உண்டியும் சீர்மை நிலைத்திட.
இழப்பினும், பிழைப்பினும் சமநிலை மனது.
பிறப்பிலும், இறப்பிலும் வினைப்பயன் உளது.

++++++++++++++++ 

சொல்லில் செயலில் மனித இன நேயம்
உள்ளொளி வீசிட உந்து.

++++++++++++++++

மானிடன் எல்லாம் தனது சிலுவையை

தானே சுமக்கும் முதுகு .   

++++++++++++++++

கணினி யுகமே நான்காம் தமிழ்ச் சங்கம் 
உலகில் பரவி விரியும் தமிழ்ச்  சங்கப் பலகை. 
எனக்கோர் இடமுண்டு உறுதி அப்பலகையில்

++++++++++++++++++++++++

எனது ஓய்வு காலப் பணி

சி. ஜெயபாரதன், கனடா

பொழுது புலர்ந்ததும்

உறங்கும்என்னை 

உசிப்பி

எழுப்புவது

உயிர்க் கடவுள். 

மெல்ல

விழிப்பது நான்.

தொழுது

தொடங்குவது

உடற் பயிற்சி

மனப் பயிற்சி, பின்பு

கடமை வினை.

தனக்கு, பிறர்க்கு,

ஊருக்கு.

காலைச் செய்தி படிப்பு.

நாட்டுக்கு

நல்வினை, நல்வழி

நினைப்பு.

முதல்வினை துவங்க முனைப்பு

படுக்கும் முன்பு

நாட் செயல் பயன்பாடு 

கணக்கு எடுப்பு.

==================

ஊருக்கோர் போதிமரம்
சி. ஜெயபாரதன், கனடா

ஊருக்கோர் ஆலயம் ​ 

நமக்கு​

உள்ளேயே ​நிலையாய்​

இருக்குது.

நெறி புகட்டும் நெஞ்சத்து

நீதிபதியாய். 

அறிவைப் பெருக்க

ஊருக் குள்ளே ஓர் நூலகம்

திறந்து நம்மை

அழைக்குது.

நீருக்கோர்  தேவை

ஊர்புறத்தில்

ஓடும் ஆறாய்

நீர் சேர்க்கும் சுனை ஏரி.

வேளாண்மை

ஏருக்கு வேண்டும்

இரட்டைக் காளை.

ஊர் மக்கள்

கல்வி பெருக வேண்டும்

ஓர் பல்கலைக் கழகம்.

நச்சு மரம் நட்டு,

நட்டு,

நாட்டைச் சிதைப்போர்

கூட்டத்தின்

அச்சாணி முறிய, 

ஒருவர்

சிந்திக்க வேண்டும்  

ஓர் போதிமரம்

ஊருக்கு வெளியே !

=================================

மதங்கள் எவ்வழி மனிதர் 

அவ்வழி

சி. ஜெயபாரதன், கனடா

மனிதம் தோன்றும்

முன்னே.

மதங்கள் தோன்றின

பின்னே.

மதம் ஒரு யானை

மனிதர் 

குயவன் மண் 

பானை.

ஞானம் உடையது

மானிடம். 

மதம் மனிதனின்

வடிவ நிழல். 

மனித நேயம் பெருக

மதங்கள்

நாட்டுக்குத்

தேவை.

காட்டு மனிதரை

நாட்டு

மனிதர் ஆக்க

வீட்டுக்குள்

புகுந்தன மதங்கள்.

வள்ளுவம்

வையத் தமிழரின்

மெய்மதம். 

மதக் குருமார்

மதத்தைத் திருத்த

வேண்டும் !

மனிதம்

முன்னேற வேண்டும்.

ஒன்றாய்க் கூடி,

நன்றாய்,

ஒரு நாட்டில்

ஒழுங்கு முறையாய்.

உன்னதம்

பெற வேண்டும்.

=============

சீர்மை,  நேர்மை,  ஓர்மை

சி. ஜெயபாரதன், கனடா

சீர்மை நேருமோ அரசியல்

தீரரால் ?

நேர்மை புரியுமோ அம்பேத்கார்

வார்த்தைகள் ?

ஓர்மை நாட்டுமோ ஈவேரா

தீர்வுகள் ?

சீர்மை, நேர்மை, ஓர்மை 

என்னும்

முச்சீர்மை நடைமுறை

இச்சகத்தில்

நிச்சயம் நிலவிடும்,

உச்சமான 

மனித நேய முள்ள

மதங்களால்

மட்டுமே.

===========================

===================================

எனக்கு வழிகாட்டி நெறி :

 

சத்தியம்,  சுதந்திரம்,  சமத்துவம், அவையே

தமிழியம், இந்தியவியம், உலகவியம்.

 

இந்த வழிபாடு, வாய்ப்பாடு, வையக முறைப்பாடு, எல்லா வினைகளுக்கும், சிந்தனைகளுக்கும், செயற்பாடுகளுக்கும், நியாய நீதிகட்கும், மனித நேய சிந்தனை ஏற்கும் முப்பெரும் நெறிப்பாடாகும்.

 

சி. ஜெயபாரதன்

++++++++++++++++++++++++++++++++++++++++++++++

சத்தியம், சுதந்திரம், சமத்துவம்.

[காந்தீயக் கோட்பாடு]

நேர்மை தவறேல், நேர்படப் பேசு, நேர்மையே சீர்மை

***********************

காந்தீயக் கோட்பாடு என்ன என்பது முதலில் நான் குறிப்பிட  வேண்டும்.

சத்தியம், சுதந்திரம், சமத்துவம் ஆகிய மூன்றும் பின்னிய தேசம், ஆட்சி, ஆணையகம், அரசாங்கம், அமைச்சர், அரசாங்கப் பணியாளர், நாடாளும் மன்றம், ஊராட்சி, பல்கலைக் கழகம், கல்விக்கூடம், துணை வேந்தர், கோயில் திருப்பணி, சமயத் திருப்பணி, சட்ட நீதி மன்றம், நீதிபதி,  உயர்நீதி,  உச்சநீதி மன்றம், காவல்துறை, தொழிற்சாலைகள், தொழிற்சாலை அதிபர், ஊழியர், சமூக சேவை, இல்லறம், துறவறம், மருத்துவக் கூடம், மருத்துவர், மருத்துவப் பணியாளி, சட்ட நிபுணர், வழக்காடுவோர் ஆகிய இந்தியருக்கு வேண்டும்.

சுதந்திரம் [உரிமைப்பாடு, விடுதலை உணர்வு] மனிதப் பிறப்புரிமை.  சுதந்திரம் என்பது கட்டுப்பாடுள்ள சுதந்திரம். கட்டவிழ்த்தோடும் பூரண சுதந்திரமில்லை.  சுதந்திரம் நடுவில் அடைபட, அதைக் கட்டுப்படுத்த ஒருபுறம் சத்தியம், மறுபுறம் சமத்துவம் உள்ளது.

சத்தியம் என்பது நேர்மை, மெய்ப்பாடு, உண்மை நெறி.  சத்திய நெறியற்ற சுதந்திரம் தீவிர இன்னல் விளைவிக்கிறது.  அதுபோல் சமத்துவம் இல்லாத சுதந்திரம் மேல்ஜாதி, கீழ்ஜாதி  பிரிவுகளைப் பெருக்கிறது. நேர்மையில்லாத துணைவேந்தர் பதவிக்கு லஞ்சம் வாங்குகிறார்.

அறநெறி, உரிமை, சமநெறி என்ற முப்பெரும் ஒப்பிலாப் பண்புகளே காந்தீயக் கோட்பாடு.  சத்தியம், சுதந்திரம், சமத்துவம் எந்த நூற்றாண்டுக்கும் ஏற்புடைதாகும்.

*****************************

கற்றதனால் பெற்ற பயன் ஏது  படைப்பாளி
அற்புதத்தைக் காணாத போது ?

நெஞ்சின்  உயிரலைகள் நின்றுவிட்டால் என்வாழ்வில்
துஞ்சிடும் ஆக்கவினைத் தொண்டு ! 

இறைவன் எனக்கு ஆயுளை நீட்டும் ஓவ்வோர் நாளும், முடிந்த ஓவ்வோர் ஆண்டும் பயனுள்ளதாக நிகழ எனக்களித்த ஒருமாதவக் கொடைதான்.

அணுவிலிருந்து அகிலம்வரை சிறிதளவு அறிந்து, கண்டுபிடிப்பு களில் நூற்றில் ஒன்றோ, அல்லது ஆயிரத்தில் ஒன்றோ தமிழில்  எழுதித் தமிழருக்குக் காட்டஇப்பிறப்பில்  எனக்கு வாய்ப்பளித்த எல்லாம் வல்ல கடவுளுக்கு நான் அடிபணிகிறேன். 

ஆண்டவனை நேராகப் பார்க்கனும்
அவனிடம்  ஒரு கேள்வி கேட்கனும்
ஏண்டா இந்த பூமியைப் படைச்சே ?
என்னையும் அத்தோடு  இணைச்சே  ?

ஏட்டிலே நெறிகள் எழுதி வைத்தேன்,
இணையத்தில் பின்னி வைத்தேன்,
பாட்டிலே இசைத்து வைத்தேன்,
பாறையில் செதுக்கி வைத்தேன். 

+++++++++++++++++++++

ஜாதி, மதம், பிறந்த மண் பிணக்கு

மனித நேயம் ஊட்டும் மதங்கள்
மனித வாழ்நெறி காட்டும் மதங்கள்,
மனித ஒருங்க மைப்பு மதங்கள்
மக்களுக்குத் தேவையடி பாப்பா.

ஜாதிக்கு ஆழம் உள்ளது பாப்பா
ஜாதிக்கு அகலம் உள்ளது பாப்பா
ஜாதிக்கு உயரம் உள்ளது பாப்பா.
ஜாதிகள் மேலாக உள்ளவை பாப்பா

ஜாதிகள் தீவல்ல பாப்பா, நமக்கு
ஜாதிகள் வேலி அல்ல பாப்பா.
ஜாதிகள் சின்னமடி பாப்பா, நமக்கு
ஜாதிச் சகிப்பு வேணுமடி பாப்பா.

ஜாதி, மதப் பிறந்த மண் பிணக்கு
பாதிக்கக் கூடாது நம்மை பாப்பா
பாரத மக்கள் பல கோடி பாப்பா
சீராகக் கூடிச் செயல்புரி பாப்பா

++++++++++++++++++

[September 13, 2014]

https://jayabarathan.wordpress.com/

http://kadaisibench.wordpress.com/2014/09/13/தமிழில்-சில-நுட்பம்-சார்/

சி. ஜெயபாரதன், B.E. (Hons), P.Eng. [Nuclear] Canada

(பிறப்பு :  பிப்ரவரி 21, 1934)

ஆதி முதல்வனை,  அண்டக்  குயவனை 
ஓதிப் பணிவேன் என் உள்ளத்தில்  – வீதியிலே
இற்றுவிழும் மாந்தர் எழுந்து பயன் பெற நீ
வற்றாத் திறன் ஊட்ட வா.

++++++++

போர் வாளை எல்லாம் நெளித்துப்
பயிர்விளைக்க
ஏர் முனை ஆக்கிடு இனி !
பெய்யும் மழைநீரைப் பேரணையில்
சேர்த்தால் ஏன்
வையத்தில் பஞ்சம் வரும் இனி ?
காற்றாடி, சூரியக் கதிர்களும் மின்சக்தி 
ஆற்றல் அளிக்கும் அறி.

++++++++++

சிலைகள் சுமப்ப  தில்லை
சிற்பக் கோபுரத்தை !
வலைகள் பிடிப்ப தில்லை
வசிய முத்துக்களை !
கலைகள் நிரப்பு வதில்லை
காந்தும் பசி வயிற்றை !
அலைகள் குலுக்குவ தில்லை
ஆழ்ந்த சமுத்திரத்தை !

++++++++

தோல்விகள் தோள்வரை
ஏறினும் வெற்றி
கால் பாதம் வரை
வராதா ?
மேலேறிச்  சிகரம் தொட
மூச்சு வாங்கும் !
நாள் செல்லும் வெற்றியின்
நறுமணம் நுகர !

++++++++++

அணுவினைப் பிளந்த நான்
அன்பையும் பிளந்து
நுணுகி நுணுகி
நோக்கினேன் ! அங்கும்
அன்னை சக்தி
என்னை மயக்கி
முறுவல் செய்தாள் !
சிறுவன்
பணிந்தேன் அதன் திருப்
பாதங்களில் ! 

+++++++++++

தொடுவானச் செங்கதிர்

தோல்விப் படிகளில் 
ஏறி வந்தேன், வெகு
தொலைவில் 
வானம் வெளுத்ததடா !
காலச் சுழற்சியில் 
கோள் உருண்டு, எழும்
காலைக் கதிரொளி 
பட்டதடா !

கீழே வீழ்ந்தயென் 
கால் முறியும், ஆயின் 
கிட்டே எனக்கொரு
கோல் தெரியும்.
மேலே எழுந்திட 
ஆர்வம் மிகும், நிமிர்ந்து
 மீண்டும் முயன்றிட  
ஆவல் எழும்.

தோல்விக்குப் பின்
கற்றது நான்
கால் பந்தளவு ! 
வெற்றி பெற்ற பின்
கற்றது நான்
கடுகு அளவு !

+++++++++++++++

தொடுவானுக்கு அப்பால்

தொடுவானுக்கு அப்பால் சென்றால் 
தொப்பென வீழ்வோ மெனச்
சொப்பனம் கண்டோம்!
செல்லாதே என்று
சிவப்புக் கொடி காட்டும்
செங்கதிரோன்!
தங்கப் பேராசை கொண்டு
இந்தியாவுக்கு
புதிய கடல் மார்க்கம் தேடி
அஞ்சாமல் மீறிச் சென்றார்
கொலம்பஸ்!
புத்துலகு, பொன்னுலகு
அமெரிக்கா கண்டு பிடிக்க
வழி வகுத்தார்!
தொடுவானம் தாண்டிப் பயணித்து
துவங்கிய இடம் வந்தார்!
உலகம் தட்டை இல்லை 
உருண்டை !
அச்ச மின்றி, அயர்வு மின்றி
உச்சி மீது வான் இடிந்தும்
முன் வைத்த காலைப்
பின்வாங்காது,
முன்னேறு வதுதான்
முதிர்ச்சி நெறி ! முயற்சி வழி !
புதியவை கண்டுபிடிக்க
மனித இனத்துக்கு
உறுதி விதி!

 ************

மதுரை மாவட்டம் திருமங்கலத்தில் பிறந்து, மதுரைக் கல்லூரியில் படித்து, 1956 இல் சென்னைப் பல்கலைக் கழகத்தில் மெக்கானிகல் எஞ்சியரிங் பட்டம் பெற்றேன்.  பாம்பே பாபா அணுவியல் ஆய்வுக் கூடத்தில் 1957 ஆம் ஆண்டு சேர்ந்து, பாரதத்தின் முதல் பேராற்றல் கொண்ட (40 MWt) ஆராய்ச்சி அணு உலையான ஸைரஸ் (CIRUS) ஆய்வு உலையை இயக்கும் எஞ்சினியர்களில் ஒருவராக 1960 முதல் 1966 ஆண்டு வரை பணி புரிந்தேன். அதன் பிறகு கோட்டா, ராஜஸ்தானில் கனடா உதவியுடன் கட்டப் பட்ட முதல் கான்டு அணுமின் சக்தி நிலையத்தை இயக்க மூன்றரை ஆண்டுகள் (1966-1970) கனடாவில் உள்ள டக்ளஸ் பாயின்ட் அணு மின்சக்தி நிலையத்தில் பயிற்சி பெற அனுப்பப் பட்டேன். பயிற்சி முடிந்த பின்பு 8 ஆண்டுகள் [1970-1978] ராஜஸ்தானிலும், 4 ஆண்டுகள் (1978-1982) சென்னை கல்பாக் கத்திலும் பாரத அணுமின் சக்தி நிலையங்களில் பெரிய பதவிகளில் பணியாற்றினேன். எனது சிறப்புப் பயிற்சி அணுமின் உலைக்குச் சுயமாக யுரேனிய எரிக்கோல் ஊட்டும் சிக்கலான யந்திரத்தை இயக்குவது, பராமரிப்பது, அதை இயக்க மற்றவருக்குப் பயிற்சி தருவது. 25 ஆண்டுகள் இந்திய அணுசக்தித் துறையகத்தில் வேலை செய்து, முன்னோய்வு எடுத்துக் கொண்டு 1982 முதல் 2001 வரை கனடாவில் இயங்கும் பேராற்றல் கொண்ட கான்டு புரூஸ் அணுமின் நிலையத்தில் பணியாற்றி இப்போது முழு ஓய்வில் இருக்கிறேன்.

அணுசக்தி ஆக்கப் பணியில் பொறியியற் துறைகளில் 45 ஆண்டுகளுக்கு மேலாக அனுபவம் பெற்று, இப்போது தமிழ் இலக்கியப் படைப்புப் பணியில் முழு நேரமும் ஈடுபட்டி ருக்கிறேன். 1960 ஆண்டு முதல் எனது விஞ்ஞானக் கட்டுரைகள், கதைகள், கட்டுரைகள் பல கலைமகள், மஞ்சரி, தினமணிக் கதிர், இதயம் பேசுகிறது, மயன், தாய், காலம் இதழ்களில் வெளி வந்துள்ளன. கணனித் தமிழ்வலைக் கூடங்கள் பின்னிப் பிணைக்கும் புதிய உலகிலே, கடந்த ஏழு ஆண்டுகளாக 500 மேற்பட்ட கட்டுரைகள், கவிதைகள், கதைகள், நாடகங்கள் அம்பலம், திண்ணை, பதிவுகள், அந்திமழை, நதியலை போன்ற வலைத் தளங்களில் வந்துள்ளன.  எனது நீண்ட தமிழ் நாடகங்கள் மொம்பையிலும், சென்னைக் கல்பாக்கத்திலும் அரங்கேறியுள்ளன.

இதுவரை இருபத்தி ஏழு தமிழ் நூல்கள் வெளிவந்துள்ளன: ஆக்க வினைகளுக்கு அணுசக்தி, வானியல் விஞ்ஞானிகள்,  அணுவிலே ஆற்றல், இந்திய விஞ்ஞான மேதைகள், தாகூரின் தமிழ்க் கீதாஞ்சலி, அணுவின் ஆற்றல், இந்திய விஞ்ஞான மேதைகள், சீதாயண நாடகம், சீதாயணம் படக்கதை, கீதாஞ்சலி, ஆபிரஹாம் லிங்கன் [நாடகம்], சாக்ரடிஸ் [நாடகம்],  ஆயுத மனிதன், [நெப்போலியன்], ஜோன் ஆஃப் ஆர்க், முக்கோணக் கிளிகள் படக்கதை, கலீல் கிப்ரான் கவிதைகள், விண்வெளி வெற்றிகள், அணுமின்சக்தி பிரச்சனைகள், மெய்ப்பாடுகள், அணுசக்தியே இனி ஆதார சக்தி, நைல் நதி நாகரீகம், உலகிலே உன்னத பொறியியற் சாதனைகள்.  காதல் நாற்பது, பிரபஞ்சத்தின் மகத்தான புதிர்கள் : தொகுப்பு – 1 & தொகுப்பு – 2.  அண்டவெளிப் பயணங்கள், விழித்தெழுக என் தேசம் [கவிதைத் தொகுப்பு]  ஓர் ஆங்கில மொழிபெயர்ப்பு நூல். [Echo of Nature] [Environmental Poems]

எனது தந்தையார் உயர்திரு. சி. சிங்காரவேல் பாண்டியன் அவர்கள் இந்திய விடுதலைப் போராட்டத்தில் பல ஆண்டுகள் மகாத்மா காந்தியின் கீழ் பணியாற்றிப் பங்கெடுத்துச் சிறைக்குச் சென்றவர்.  பிரதமர் இந்திரா காந்தியின் தியாகி தாமிரப் பட்டயம் பெற்றவர். பெற்றவர்.  முதல்வர் காமராஜர் அளித்த தியாகிகள் ஓய்வு ஊதியம் பெற்றவர். ஐந்து வயது முதலே காலை ஆறு மணிக்கு நீராடிப் பாரதியின் தேசீய, பக்திப் பாடல்களை அனுதினமும் காலைப் பிரார்த்தனையில் தந்தையுடன் கலந்து பல ஆண்டுகள் பாடி வந்ததால் பாரத நாட்டுப் பற்றும், பைந்தமிழ் மொழிப் பற்றும்  குருதி, எலும்பு, சதை அனைத்திலும் பதிந்து விட்டன.

எனது குறிக்கோள் தமிழில் புதிதாக விஞ்ஞானப் படைப்புகள், நாடகக் காவியங்கள் பெருக வேண்டும் என்பதே.  “மகத்தான பணிகளைப் புரிய நீ பிறந்திருக்கிறாய்” என்று விவேகானந்தர் கூறிய பொன் மொழியே என் ஆக்கப் பணிகளுக்கு ஆணிவேராக நின்று ஒரு மந்திர உரையாக நெஞ்சில் அலைகளைப் பரப்பி வருகிறது.

சி. ஜெயபாரதன்,
கிங்கார்டின்,
அண்டாரியோ, கனடா.

ஜனவரி  1, 2020 [R-8]  (புதுப்பிக்கப் பட்டது)